Тэлеканалу "Беларусь 3" спаўняецца 5 год

Першы ў краіне сацыякультурны канал быў створаны ў структуры медыяхолдынгу па даручэнні Главы дзяржавы з мэтай папулярызацыі і захавання беларускай культурнай спадчыны і пачаў сваё вяшчанне 8 лютага 2013 года.

З моманту заснавання тэлеканал дорыць гледачам лепшыя ўзоры айчыннага і сусветнага кінамастацтва, знаёміць з тэатральнымі прэм’ерамі і класічнымі пастаноўкамі, музычнымі канцэртамі вядомых выканаўцаў і адкрывае новыя імёны. У эфіры канала шмат арыгінальных праграм, створаных як для маленькіх гледачоў, так і для дарослых, каб пазнаёміць іх з народнай творчасцю ў розных кутках Беларусі, сучаснымі карцінамі айчынных мастакоў, дасягненнямі беларускай навукі, эстрадай савецкага часу, выканаўцамі бардаўскай песні і самымі выбітнымі дзеячамі нашай культуры.

Прыярытэтам у вяшчанні для тэлеканала “Беларусь 3” з'яўляецца прапаганда нацыянальных і культурных традыцый беларускага народа ў сусветным кантэксце. Выдатныя дзеячы беларускай культуры, гісторыі і асветы, якія ўнеслі значны ўклад у сусветнае развіццё – героі дакументальных стужак і асветніцкіх праектаў тэлеканала. Фарміраванню станоўчага погляду на дасягненні беларускіх асветнікаў, грамадскіх дзеячаў, вучоных і іншых гістарычных асоб у сусветным маштабе спрыяе паказ праектаў тэлеканала “Беларусь 3” на міжнародным спадарожнікавым тэлеканале “Беларусь 24”.

Асаблівая ўвага на “Беларусь 3” надаецца папулярызацыі роднай мовы. Беларускамоўныя праекты на канале займаюць каля 75% ад агульнай колькасці праграм уласнай вытворчасці. Штодзённае вяшчанне тэлеканала на беларускай мове складае 32% ад агульнага аб'ёму. Гэта больш за 5 гадзін у суткі.

У Дзень нараджэння тэлеканала ў Нацыянальным мастацкім музеі Беларусі адбудзецца прэм’ера хранікальна-дакументальнага фільма “Беларусь 3. 5 год у эфіры”, які раскажа і пра першы дзень эфіру сацыякультурнага канала, і пра праекты, якія выходзяць усе 5 гадоў, і пра планы на будучыню. У фільме выкарыстаны кадры з цікавымі здарэннямі, што адбываліся на здымачнай пляцоўцы падчас стварэння многіх праектаў. Таксама стужка “Беларусь 3. 5 год у эфіры” адкажа на пытанні, калі канал плануе перайсці на HD-фармат і наколькі для яго гэта важна. Тэлегледачы “Беларусь 3” змогуць убачыць гэты фільм 11 лютага ў 13.20.

У 2017 годзе сетка вяшчання “Беларусь 3” была цалкам зменена, і цяпер яна выбудавана па бясшвоўным лінейным прынцыпе. Абнавілася і графічнае афармленне. За мінулы год у эфір выйшлі новыя арыгінальныя праекты “Беларусь як песня”, “Майстры і куміры”, “Люблю і памятаю”, “Майстэрня. Гісторыя аднаго мастака”, “Тэатр у дэталях”, “Хата на хату” і інш. Адна з важных асаблівасцей пры стварэнні тэлепраектаў – запрашэнне і далучэнне ў якасці аўтараў, вядучых і кансультантаў аўтарытэтных спецыялістаў у галіне культуры і мастацтва.

Упершыню ў тэлевізійнай прасторы краіны на канале “Беларусь 3” з мэтай падтрымкі маладых рэжысёраў і папулярызацыі беларускага кінематографа распачаўся паказ дыпломных прац студэнтаў Беларускай дзяржаўнай акадэміі мастацтваў.

Важным этапам у змястоўным напаўненні тэлеканала “Беларусь 3” стала стварэнне тэматычных эфіраў, прымеркаваных да святкавання юбілеяў з дня нараджэння беларускіх пісьменнікаў. Так, 7 ліпеня ў дзень 135-годдзя з дня нараджэння Я.Купалы і 3 лістапада ў дзень 135-годдзя з дня нараджэння Я.Коласа тэлеканал стварыў тэматычныя эфіры “Мой Купала” і “Мой Колас”, якія адпаведна цалкам складаліся з праектаў, прысвечаных жыццю і творчасці пісьменнікаў.

Сацыякультурны канал і ў 2018-м працягне стварэнне тэлеверсій значных культурных мерапрыемстваў, міжнародных і рэспубліканскіх фестываляў, конкурсаў, форумаў, святаў і пленэраў, канцэртаў, лепшых спектакляў беларускіх тэатраў, творчых сустрэч з вядомымі дзеячамі культуры і мастацтва.

У сакавіку ў эфір выйдзе чатырохсерыйны гістарычны дакументальны фільм “Хатынь”, прымеркаваны да 75-ай гадавіны трагедыі. Гэтак жа ідзе праца над стварэннем дакументальных фільмаў да 85-годдзя з дня заснавання Вялікага тэатра Беларусі, да 220-годдзя з дня нараджэння пісьменніка Адама Міцкевіча, да 80-годдзя з дня заснавання Нацыянальнага мастацкага музея.

У новым сезоне 2018-2019 плануюцца прэм'еры цыклаў праграм аб прадметах культуры і мастацтва “Артэфакты”, пра асаблівасці архітэктуры “Архітэктура Беларусі” і пра нематэрыяльную культурную спадчыну “Жывая культура”.

Ужо зараз у эфіры сацыякультурнага канала выходзяць святочныя відэаролікі, дзе з 5-годдзем “Беларусь 3” віншуюць вядомыя артысты, музыканты, мастакі. Сярод іх – старшыня Беларускага саюза мастакоў, графік Рыгор Сітніца; рэжысёр, мастацкі кіраўнік Тэатра-студыі кінаакцёра, народны артыст Беларусі Аляксандр Яфрэмаў; акцёр, заслужаны артыст Беларусі, прафесар Уладзімір Мішчанчук; актрыса, народная артыстка Беларусі Таццяна Мархель; акцёр, рэжысёр, мастацкі кіраўнік Рэспубліканскага тэатра беларускай драматургіі Аляксандр Гарцуеў; драматург, старшыня Беларускага саюза тэатральных дзеячаў Аляксей Дудараў; галоўны дырыжор Нацыянальнага сімфанічнага аркестра Рэспублікі Беларусь, народны артыст Беларусі Аляксандр Анісімаў; салістка Вялікага тэатра Беларусі, народная артыстка Беларусі Настасся Масквіна і іншыя. Акрамя цёплых слоў у адрас канала-юбіляра, яны цытуюць класікаў беларускай літаратуры і расказваюць, што для іх значыць культура.